KUMBUKIZI YA NYERERE: GAZETI LA AN-NUUR LILIVYOMUADHIMISHA BABA WA TAIFA

Udini Umeingia Kumbukumbu ya Nyerere – M. Said

 Na Bakari Mwakangwale

Mohamed Ramadhani akimhoji Mwandishi

IMEELEZWA kuwa si kwamba mambo yote yalikwenda vuzuri katika historia ya Mwl. Julius Nyerere, bali pia yapo malalamiko kuhusu mwanasiasa huyo wa Tanzania.

Hayo yamebainishwa na Mwanahistoria wa historia ya Tanganyika, Sheikh Mohammed Said, katika mahojiano maalum ya kumbukumbu ya kifo cha Mwl. Julius Nyerere, Oktoba 14, 2015, na kurushwa na Televisheni ya Azam, Jumatano wiki hii.

Mohammed amesema ili kuweka kumbukumbu sahihi ya Tanganyika (Tanzania) ni vyema historia ya Mwl. Nyerere, iandikwe au kusimuliwa sambamba na wale alioshirikiana nao kwani sehemu kubwa ya historia hiyo haijaandikwa kwa usahihi unaotakiwa.

Akizungumzia kuhusu malalamiko dhidi ya Mwl. Nyerere, Mohammed Said amesema kuwa Waislamu hawakutegemea kwamba baada ya kudai Uhuru kwa hali na mali zao, hali zao leo ziwe kama zilivyo sasa baada ya Uhuru.

Alisema, kabla na baada ya Uhuru Waislamu hawakudhani kuwa watakuwa ni watu wa kutothaminiwa na kujikuta wanakuwa watu wa chini ukilinganisha na wenzao.

Akasema, ni bora wakubwa wanaokamata nchi walitazame suala hili la Waislamu, katika nchi hii, wajiulize je wameridhika na hali waliyonayo (Waislamu) au kuna tatizo linalofanya wao kuwa katika hali hiyo.

Akijibu swali kwamba, inasemekana kuwa Waislamu wenyewe hawakutaka kupata elimu na maendeleo, alisema haiwezekani watu wasiotaka elimu na maendeleo waingie katika harakati na mipango ya kujenga Chuo Kikuu mwaka 1968, ikiwa ni muda mfupi baada ya Uhuru.

“Mwaka huo Waislamu walitaka kujenga Chuo Kikuu cha kwanza nchini, jambo ambalo lilileta mgogoro mkubwa na Serikali ya Mwl. Nyerere, baada ya kuvurugiwa mipango na juhudi zao kwa makusudi na baada ya hapo hawakuweza tena kunyanyuka.

“Kwa maana hiyo, tusijidanganye kuwa kila kitu wakati wa Mwl. Nyerere, kilienda sawa yapo malalamiko mengi, laiti kama nisinge andika kitabu cha ‘Maisha na Nyakati za Abdulwahid Sykes’ usinge julikana mchango na historia ya Waislamu katika kutafuta Uhuru wa Tanganyika.” Alisema Shkh. Mohammed.

Ama akizungumzia historia ya Mwl. Nyerere na harakati za kudai Uhuru, Shkh. Mohammed Said aliweka bayana kwamba, historia ya Mwl. Nyerere, haijaandikwa kwa usahihi unaotakiwa, pamoja na kuwa wapo waliojitahidi kuandika lakini haijitoshelezi.

Mwanahistoria huyo, alisema kwamba suala hilo amekuwa akilieza siku zote kwamba, historia ya Mwl. Nyerere, haiwezi kunoga ikiwa atazungmzwa yeye Mwl. Nyerere, peke yake huku watu waliokuwa nae wasielezewe au kutajwa.

Ili historia hiyo iwe sahihi ni vyema iandikwe historia sambamba na wale alioshirikiana nao, ambao wapo wengi sana, huku akimtaja Mzee  Mshume Kiate, ambaye alipambana sana katika kupigania Uhuru wa nchi hii.

Alisema, kwa kutambua mchango wake wakati huo Mzee Kitwana Kondo, akiwa Meya wa Jiji la Dar es Salaam, alisema moja ya mitaa Kariakoo upewe jina la Mzee Mshume, lakini akasema mpaka leo suala hilo halijatekelezwa.

Alisema, moja ya mchango wake Mzee huyo, alikuwa ni kulisha ama kutoa chakula kwa familia ya Mwl. Nyerere, akimtaka yeye (Nyerere) aelekeze nguvu zake kupambana na Waingereza bila kuwaza familia yake watakula nini.

Alisema, katika kutekeleza hilo, ilikuwa gari ya Saidi Kamtawa (Said TANU), kila siku asubuhi linafika  Sokoni Kariakoo (Dar es Salaam), ambapo Mzee Mshume, anakusanya vyakula vya aina mbalimbali vinapelekwa Magomeni, nyumbani kwa Mwl. Nyerere, zoezi alilolifanya mpaka Uhuru unapatikana.

Alimtaja Mzee Idd Faizi Mafongo, na kuhoji leo hii nani anayemjua, ambaye kadi yake ya TANU ilikuwa ni namba 25, alikuwa ndiye mweka hazina wa TANU.

Alisema, katika mipango ya safari ya Nyerere kwenda Umoja wa Mataifa, Bw. Mafongo, ndiye aliyekuwa akiratibu mipango ya fedha za safari hiyo ambapo Waingereza walimkamata, kabla Mwl. hajafanya safari hiyo.

Aidha, aliwataja pia Tatu bint Mzee, Bw. Clement Mtamila, na kueleza kwamba barua ya Mwl. Nyerere aliyoandikiwa na Waingereza kuwa achague kati ya siasa au kazi, aliipeleka nyumbani kwa Mzee huyo (Mtamila), Mtaa wa Kipata na Sikuku.

Alisema, hapo alikutana na wazee wa TANU, na kujadili suala hilo ambapo walimwambia aachane na hiyo kazi na aungane nao moja kwa moja na wao watamlipa mshahara ili wapambane na Waingereza wapate nchi yao ya Tanganyika.

Katika harakati hizo za kudai Uhuru, Shkh. Mohammed, alisema kwa mujibu wa Abas Sykes, wakati huo wazungumzaji wakuu walikuwa watatu, alikuwepo Shkh Suleiman Takadir, akimtambulisha Mwl. Nyerere, katika mikutano ya siasa, alikuwepo Bibi Titi Mohammed, nae alikuwa akizungumza baada ya Shkh. Takadir, kisha Mwl. Nyerere, huongea mwishoni.

“Bibi Titi, ni mmoja wa wanawake waliomjenga sana Mwl. Nyerrere, akiwa na mwenzake, akiitwa Bi Hawa bint Maftah, ambaye alikuwa akiishi mtaa wa Mkunguni, Jijini Dar es Salaam.” Alisema Shkh. Mohammed.

Ama, kwa upande wa mikoani alisema, Mwl. Nyerere, akiwa Lindi, aliongozana na Rajabu Diwani, na alifikia katika nyumba ya Mzee Suleiman Mnyumvi, Mtaa wa Makonde, (Nyumba hiyo hadi sasa ipo), ambapo, Mjini Moshi, nyumba ya Bi. Halima Selengia, aliyefariki miaka miwili iliyopita, ndio alikuwa akifikia Mwl. Nyerere.

Alisema, hao pamoja wengine baadhi yao kama vile, Salum Mpunga, Yusuph Chembera, Sharifa Bint Mzee, nao wana haki ya kutajwa na kuenziwa sawa na Mwl. Nyerere kwa kuwa ndio walikuwa wakimsaidia katika harakati hizo.

 “Sasa tunaposema tunamuenzi Mwl. Nyerere, basi na hawa wazee pia wapewe hadhi yao, watajwe au kama kuna khotuba zao ziwekwe zisikike pia kwa kufanya hivyo tutakuwa tumefanya kumbukumbu yake kwa usahihi.

Huwezi kumuenzi Mwl. Nyerere bila kuwataja hawa wasaidizi wake waliokuwa wakimsafishia njia na kumtambulisha kwa wenyeji wa miji mbalimbali.” Alisema Shkh. Mohammed.

Akizungumzia uchaguzi Mkuu wa mwaka huu 2015, alisema uchaguzi huu huwezi kuufananisha na chaguzi zozote zilizopita hapa nchini ukitoa ule wa kura tatu, uliofanyika mjini Tabora, mwaka 1958, kutokona na kuwa na hamasa kubwa.

Alisema, ukirejea vyama vilivyopigania uhuru katika nchi jirani na Tanzania, ambavyo tayari vimeondolewa madarakani, kama vile kule Kenya, Malawi na hata  Zambia, akasema sasa inaonyesha kuna uwezekano mkubwa hali hiyo ikaingia Tanzania.