SHEREHE YA KUWEKA JIWE LA MSINGI KAMPASI YA MUM KIGAMBONI DAR ES SALAAM

Prof. Hamza Njozi Vice Chancellor Muslim University of  Morogoro

Prof. Hamza Mustafa Njozi akizindua Kamapasi ya Kigamboni, Dar es Salaam

Wanafunzi wa Chuo Kikuu Cha Waislam Morogoro  (MUM) wakipanda mabasi kuja
kwenye shsrehe ya kuweka jiwe la msingi Kampasi ya Kigamboni, Dar es Salaam

Ulipopatikana uhuru mwaka wa 1961 Sheikh Hassan bin Ameir aliwatangazia Waislam kuwa sasa anapumzika na shughuli za siasa na atatia juhudi kuwatumikia Waislam wa Tanganyika khasa katika ukombozi wa elimu kwani tayari Tanganyika ishakombolewa kutoka makucha ya wakoloni. Sheikh Hassan bin Ameir akaanzisha Daawat Islamiyya yeye mwenyewe akiwa Mwenyekiti na Katibu Schneider Abdillah Plantan. Wawili hawa wote wana historia kubwa katika kupigania uhuru wa Tanganyika. Schneider alifanya juhudi kubwa sana mwaka wa 1950 kuingiza vijana katika uongozi wa juu wa TAA, Dr. Vedasto Kyaruzi (Rais) na Abdulwahid Sykes (Katibu) na Sheikh Hassan bin Ameir yeye mwaka huo baada ya vijana kuchukua uongozi wa TAA Abdul Sykes alimtia kama mjumbe katika  TAA Political Subcommittee.

Baada ya uhuru kupatikana mwaka wa 1961 kilichofuatia ni kuitishwa kwa Muslim Congress ya kwanza mwaka wa 1962 na ya pili mwaka wa 1963. Muslim Congress ikaja na mipango ya kujenga shule za msingi na sekondari Tanganyika nzima na kumalizia na ujenzi wa Chuo Kikuu. Kazi ya ujenzi wa shule ikaanza na mwaka wa 1968 jiwe la msingi wa Chuo Kikuu likawekwa Chang’ombe na aliyeliweka alikuwa Rais wa Jamhuri ya Muungano wa Tanzania Mwalimu Julius Kambarage Nyerere.

Ahmed Rashad Ali

Ahmed Rashad Ali wakati ule alikuwa Assistant Permanent Secretary Wizara ya Habari ofisi yake ikiwa Askari Monument.

Ananihadithia Mzee Rashad. Anasema sherehe ya kuweka jiwe la msingi wa Chuo Kikuu Cha Kiislam ilikuwa kubwa haina kifani. Mabalozi wa nchi za Kiislam wanaowakilisha nchi zao Tanzania wote walialikwa na viongozi wa East African Muslim Welfare Society (EAMWS) ambao ndiyo walikuwa wasimamizi wa mradi ule walikuwapo wakiongozwa na Aziz Khaki kama mwakilishi wa Aga Khan, Patron wa EAMWS. Baada ya Mwalimu Nyerere kuweka jiwe la msingi akiwa yuko katikati ya Sheikh Hassan bin Ameir na Tewa Said Tewa mmoja wa waasisi 17 wa TANU mwaka wa 1954, alipelekwa kuangalia michoro ya Chuo Kikuu ikionyesha idara zote za chuo, Tewa Said akimpa maelezo ya ziada.

Kushoto Sheikh Hassan bin Ameir akisalimiana

Julius Nyerere katikati ya ni Tewa Said Tewa siku

ya sherehe ya kuweka jiwe la msingi Chuo Kikuu

Cha Waislam

Kushoto Sheikh Hassan bin Ameir, Julius Nyerere, Sheikh Abdallah Chaurembo
Rashid Kawawa na Tewa Said Tewa

Ahmed Rashad anasema yeye alikuwa katika ule msafara kwa ajili ya wadhifa wake akiwa nyuma ya Mwalimu Nyerere, Sheikh Hassan bin Ameir, Tewa Said Tewa kama Rais wa  (EAMWS) tawi la Tanzania. Anasema hakikuwa kilichokuwa kinampita. Radio Tanzania walikuwapo pale na Mtangazaji alikuwa akitangaza kila hatua ya shughuli ile. Akiwa katika hali ile alishuhudia kitu ambacho kwa wakati ule hakukitia maanani ila baada ya mambo mengine kutokea ndipo akazindukana. Mzee Rashad anasema aliona mtangazaji anahangaika na tape iliyojizingira katika mashine ya kurekodi na kilichomstaajabisha ni kuwa badala ya kusimamisha mashine na kurejesha nyuma ili tape ikae sawasawa yule kijana akawa anatumia mikono yake kujaribu kuinasua ile tape na kwa kufanya hivyo alikuwa anaiharibu tape yenyewe. Mzee Rashad wakati wa kupigania uhuru yeye alikuwa mtangazaji wa Radio Free Africa Cairo, radio iliyoanzishwa na Gamal Abdel Nasser kwa ajili ya ukombozi wa nchi za Afrka Tanganyika ikiwa moja ya nchi hizo. Ilimdhihirikia baadae kuwa yule kijana alikuwa anafanya yale makusudi kuharibu rekodi ya shughuli ile isibaki katika kumbukumbu katika Maktaba ya Radio Tanzania.

Waislam siku ile waligubikwa na furaha kubwa kwani ukoloni uliwabinya sana katika elimu kwa takriban miaka mia. Kuwa sasa wanajenga Chuo Kikuu hili lilikuwa jambo kubwa na la kihistoria. Chuo kilikuwa kinajengwa kwa msaada wa serikali ya Misri na mkandarasi Al Nasr kampuni ya Kimisri iliyokuwa na ofisi zake Mtaa wa Jamhuri ndiyo waliokuwa wamepewa kazi ya ujenzi wa chuo. Furaha hii haikudumu wala mafundi hawakupata hata nafasi ya kuchimba msingi wa chuo. Serikali ikaipiga marufuku EAMWS baada ya mgogoro mkubwa uliopikwa ndani na nje ya EAMWS, mgogoro uliodumu kwa kama miezi miwili hivi. Tarehe 19 Desemba, 1968 serikali ikapiga marufuku EAMWS na huo ndiyo ukawa mwisho wa ujenzi wa shule za msingi na sekondari na mradi wa ujenzi wa Chuo Kikuu. Serikali ikaunda BAKWATA kushika nafasi ya EAMWS na Sheikh Hassan bin Ameir akafukuzwa nchini.

Kuna watu wanasema kuwa Waislam hawathamini elimu na husema maneno haya kwa kukosa kujua historia ya Waislam na juhudi ambazo zimepitika katika kujinasua katika tatizo hili. Wapo wanaowasimanga Waislam kwa kupewa chuo kikuu Morogoro bure na serikali.

Bahati mbaya hapajakuwa na majibu kueleza historia ya Chuo Kikuu kilichowekewa jiwe na msingi mwaka wa 1968 na Baba wa Taifa Mwalimu Nyerere mwenyewe kwa mkono wake huku akishuhudiwa na viongozi wakuu wa taasisi za Kiislam zilizokuwapo Tanzania na picha za sherehe ile kuenea katika magazeti. Hapajakuwa na majibu kueleza kwa nini chuo hakikujengwa. Kwa kuwa hakuna majibu ya kueleza kwa nini Waislam hawakuweza kujenga chuo kile kebehi, kejeli na masimango yatakuwapo siku zote.

Tarehe 24 Machi 2018 Makamu Mkuu wa Chuo Kikuu Cha Waislam Morogoro Profesa Hamza Njozi ameweka jiwe la msingi kuzindua ujenzi wa Kampas ya Kampas ya Kigamboni Dar es Salaam. Prof. Njozi ameweka jiwe hilo la msingi kwa niaba ya Mwenyekiti wa Muslim Development Fund (MDF) mheshimiwa Abdulrahman Kinana. Jiwe la msingi limewekwa kimya kimya bila nderemo wala mialiko. 

Rigal na Mwandishi katika mgahawa New York 2011

Mwaka wa 2011 nilikuwa New York, nikiwa njiani kwenda Northewestern University, Evanston, Chicago nilikoalikwa na Idara ya African History kufanya mhadhara. Mwenyeji wangu pale New York akaniambia kuwa kuna Mmisri anafanya kazi Umoja wa Mataifa na huyu Mmisri aliwahi kufanya kazi Ubalozi wa Misri Tanzania katika miaka ya 1960. Kitabu changu, ‘’The Life and Times of Abdulwahid Sykes (1924 – 1968) The Untold Story of the Muslim Struggle Against British Colonialism,’’ kilipotoka mwaka wa 1998 huyu Mmisri, jina lake Rigal alikisoma na alikipenda sana khasa kwa kuwa kilieleza historia ya Chuo Kikuu Cha Waislam kilichokuwa kijengwe na serikali ya Misri. Rigal yeye akiwa ofisa katika Ubalozi wa Misri, Dar es Salaam alihusika sana na mradi ule na alisikitika kuwa chuo kile hakikujengwa. Mwenyeji wangu alipomwambia kuwa niko mjini alimuomba amkutanishe na mimi.

Siku ya Ijumaa baada ya kuswali sala ya Ijumaa msikiti ulio jirani na ofisi za Umoja wa Mataifa Rigal alitualika chakula cha mchana kwenye mgahawa si mbali na msikiti ule.

Rigal alitaka kusikia kutoka kinywani kwangu nini khasa ilikuwa sababu ya serikali ya Nyerere kuipiga marufuku EAMWS wakati ilikuwa na maradi muhimu wa kujenga Chuo Kikuu.

Nilimweleza kila kitu nilichokijua.

Rigal akaniuliza hali ya Waislam ikoje hivi sasa katika elimu.

Nilimweleza.

Swali alilouliza mwanafuzi katika mhadhara uliofanyika
MUM tarehe 7 Juni 2018 mzungumzaji akiwa mwandishi

Rigal aliniuliza kama nitakuwa tayari kwenda Misri na kufanya mihadhara kueleza uhusiano mzuri uliokuwapo kati ya Gamal Abdel Nasser na Julius Nyerere kiasi cha Nasser kuamua kujenga Chuo Kikuu Dar es Salaam mradi ambao kwa wakati ule ulikuwa mkubwa wa elimu Misri hawajapata kutekeleza nje ya nchi yao.