KUTOKA JF: MAREHEMU ATHMAN KILAMBO: YOUNG AFRICANS NA TIMU YA TAIFA MSHINDI WA GOSSAGE CUP 1964 NA 1965

Abunwasi,

Siku zimekwenda.

Kwenye maziko ya Abdulrahman Lukongo nilikutana na Hamisi

Kibunzi nikamweleza mazungumzo niliyokuwanayo na marehemu

Athmani Kilambo kuhusu yeye na Arthur Mambeta, Yusuf Salum

na wengineo.

Nikamwambia kuwa Yanga wakiwahusudu sana baadhi ya wachezaji

wa Sunderland na akinitajia majina.

Kilambo anasema, ''Unajua kulikuwa na watoto kule Sunderland wana

mpira mzuri sana kama Kibunzi na Arthur Mambeta na Mzee Mangara

akiwataka awalete Yanga kuongeza nguvu ulinzi na ushambuliaji...''

Kilambo anasema kuwa Mzee Mangara anatuuliza, ''Mimi nikamwambia

kuwa hawa watoto akina Kibunzi na Arthur hata tukiwaleta Yanga

hawataweza kucheza mpira huku wana mapenzi makubwa sana na

Abidjan.''

Siku zile jina lingine la Sunderland ilikuwa ''Abidjan,'' na sijui lilitokana

na nini.

Kibunzi alikuwa hana habari hizi hata chembe.

Akacheka akanambia, ''Kilambo kasema kweli sisi tusingeweza kucheza

Yanga tukipenda sana Sunderland.''

Kilambo alikuwa mzungumzaji wangu mkubwa na akijua mie siipendi

Yanga sasa yeye ikawa kila siku kuniweka roho juu.

Mechi ya Yanga na Simba Zanzibar mwanzoni 1970s, Yanga walitokea

Nigeria, basi kanifata ofisini kunitisha ananiambia, ''Tumekufanyieni

fitna kubwa Zanzibar mnachukiwa kama Hizbu.''

Kweli Zanzibar tukafungwa Yanga wakachukua kikombe.

Kilambo alikuwa muungwana akiingiliana na wachezaji wa Simba vizuri

sana na akipenda sana kumtania Emmanuel Mbele ambae akipenda

kumwita, ''Fullup.''

Waliosimama wa tatu kulia ni Athmani Kilambo, wa tano Abdulrahman Lukongo

timu ya East African Cargo Handling Services

Golikipa Athmani Mambosasa (Simba) kushoto ni Kitwana Manara na pembeni yake ni
Shaaban Baraza

Akijua mapenzi yangu ya mpira na alikuwa akinipa habari nyingi sana za

Yanga hadi uchawi wa kuloga mechi.

Siku za mwisho za maisha yake tukiswali pamoja msikiti wa Manyema na

akija akiniona hataingia ndani msikitini sharti kwanza aje anisalimie.

Athmani Kilambo (Yanga) kushoto na Abuu (Cosmo)

kulia kwenye khitma Saigon.

Kushoto wa kwanza mbele ni Hamisi Kibunzi, nyuma kulia wa kwanza Arthur Mambeta

anaemfuatia ni Emmanuel Mbele na wa sita ni Yusuf Salum.

[QUOTE="Ndinani, post: 17172926, member: 25719"]Yanga ya  AHSANTE KOTOKO: baba watoto Kilambo Athumani akiwa na beki Kapera na    Boi Wickens wanapaki bus nyuma; GOALKEEPER Elias Michael na  Centre half wao Abdulhaman Juma. Hiyo ndio Yanga ya Mangara Tabu!!![/QUOTE]

Ndinani,

Abdulrahmani Juma hakuwa ''centre half,'' watoto wa mjiini wakiita

''mkoba.

''Yeye alikuwa akicheza mbele na Yanga wakimuita ''Bwana Fedha.''

Abdulrahmani alikuwa na ''gentleman player,'' ''excellent ball control.''

Sasa pale katika alikuwa akigawa mipira kila mahali kama vile ''cashier,''

anavyolipa fedha ndiyo wakampa jina hilo.

Yanga hawakuwa na staili ya kuzuia lango yaani, ''kuegesha basi.''

Yanga walikuwa na wachezaji hodari wa kufunga kama Maulid Dilunga.

Kilambo kwa kuwa alikuwa more ''flamboyant,'' na mpira akiweza kuuchezea

yeye alikuwa ''stopper,'' akicheza mbele ya Kapera kwa kuwa Kapera

alikuwa ''stiff player.''

Kwa ajili hii Kapera akawa, ''swipper,'' yaani akipitwa Kilambo ''striker,''

atakutana na Kapera.

Hii staili wakiita ''double centre half'' yaani ''stopper na sweeper.''

Ndiyo maana Yanga walikuja kupata tabu sana kuwashinda Simba enzi za

Abbas Dilunga na Willy Mwaijibe kwa kuwa walikuwa wanashambuliwa

kutoka pembeni na ma ''winger,'' wenye mbio na wepesi.

Nitakuambia kitu ujue vipi Allah anawapa watu nema zake.

Huwezi amini lakini juu ya kuwa Kilambo alikuwa hana elimu ya sekula

lakini alikuwa hodari wa kujifunza maneno ya Kiingereza khasa yanayohusu

mpira.

Nimejifunza mengi kutoka kwake.

Yeye ndiye akinieleza tofauti ya ''placing,'' na ''shooting.''

Alikuwa akinambia, ''Mwambieni Sabu si kila mahali ni ''shooting,''

mmetukosa kutufunga kwa ajili mipira mingi ambayo angefanya placing

yeye ana shoot inakweda juu. Ile mipira ange-''place,'' yote yale magoli.''

''Hapakuwa na haja ya ''lobbying,'' pale. Yeye angepiga kweye ''box.''

Kilambo alikuwa ''sportsman,'' wakati mwingine baada ya Simba na Yanga

bila kujali matokeo yeye atafanya uchambuzi wake wa mechi.

Utamsikia anawalaumu Simba anasema, ''Nyinyi Simba mechi ya jana ndiyo

mmeiharibu. 

Hivi yule Bobeya mnampangia nini?''

Bobea alianza kama mlinda malango Zanzibar kisha akaja Simba kama

''centre half,'' lakini yeye akitumia nguvu sana uchezaji wake.

Kilambo atasema, ''Pale nyuma wangekuwa Arthur na Kibunzi mpira 

ungekuwa mzuri sana jana.'' 

Kilambo hata alipokuja kuwa mwalimu wa mpira baada ya kustaafu soka

timu yake akiifunza kucheza staili ya Kibrazil.

Ulikuwa ukiongea na Kilambo unastarehe.

Utoto wake alikuwa Bagamoyo akivua samaki.

Akikupa strori za uvuvi utashika mbavu.

Jumapili iliyopita nilikuwa na Captain Malik kwa kipindi kirefu.

Wa kwanza kulia ni Captain Malik

Captain Malik alikuwa Captain wa Yanga nadhani katika miaka

ya awali ya 1960 na ndiye aliyempokea Kilambo Yanga akitokea

Bagamoyo na kumtia moyo kuwa anaweza kupata nafasi kikosi cha

kwanza.

Juzi alinihadithia mkasa uliotokea Ilala Stadium.

Yanga walikuwa na mechi na wachezaji wote walikuwa weshaingia

uwanjani lakini Kilambo alikuwa kachelewa.

Hakuna aliyekuwa anamjua Kilambo wakati ule hivyo akazuiwa lango

kuu ikabidi Captain Malik aende akampitishe mlangoni.

Sifa moja kubwa ya Captain Malik ni kuwa yeye ni Encyclopedia ya

historia ya mpira Tanzania.

Kushoto: Boi Wickens, Captain Malik, Emmanuel Mbele na Khalid Abeid kwenye Khitma Saigon Club 2001