MASAHIHISHO KUHUSU TARIKA DANDARAWI KATIKA TAAZIA YA KAMANDA CHICO KAMA ILIVYOANDIKWA NA ABDALLAH TAMBAZA

Asalaam Aleikum Warahmatullah Taala Wabarakatuh,

Siku kadhaa zilizopita niliandika taazia ndefu kuhusu msiba wa Alhaj Kamanda Mohammed Chico.

Alhamdullilah, tulipokea simu, sms na emails nyingi mno za pongezi kutoka kwa ndugu na jamaa wanaomfahamu hayati Chico.

Miongoni mwao wapo waliotoa ufafanuzi zaidi wa masuala ya kihistoria ambayo yamezungumzwa kwenye makala ile, ambayo kwa namna moja ama nyingine, ni lazima tuyafanyie marekebisho kidogo kuweka sawa mambo.

Kwanza ni kuhusiana na Twarika ya Dandarawi. Hii haswa asili yake ni kule Misri kwenye kijiji kinachoitwa Dandara; ikasambaa kwenda sehemu nyingine za Arabuni.

Sheikh Ahmed Haidar Mwinyimvua, Imam wa Masjid Mwinyikher akiwa mwanafunzi pale al-Azhar  Sheriff  Cairo, amefika mara nyingi kijijini Dandara kumtembelea muasisi wake.

Ukweli uliopo ni kwamba hapa kwetu ilianzishwa na Sheikh Ali Saleh miaka kadhaa nyuma kabla uhuru  ambapo wengi wetu tulikuwa hatujazaliwa. Habari za Sheikh Saleh ni kubwa maana wanasema wasemao, alikuwa ni mtu wa ‘makarama na walii’.

Mzee huyu, ambaye alipata kuwa mwajiriwa wa Shirika la Reli Afrika Mashariki miaka ya nyuma hiyo, siku moja alimwendea Liwali wa wakati huo Sheikh Ahmed Swaleh na kumwambia kwamba yeye sasa hataki tena kazi ila anataka ashughulikie dandarawi tuu. Liwali akakataa akampeleka mbele ya DC Mzungu.  

DC yule alikataa katukatu. Akiwa amewaacha pale ofisini kwake, Mzungu[  alitoka nje kidogo alikoitwa. Mlangoni akamwona mtu na majoho yake kamsimamia pale mlangoni na amefanana na yule Sheikh Swaleh aliyemwacha ndani. Haraka akarudi ndani na alimkuta Sheikh yuko pale pale alipomwacha. Hakuamini, akatoka tena mlangoni anamkuta mtu yule yule na majoho yake. Akawa hana la kufanya ila kumruhusu Sheikh Swaleh aende zake akafanye shughuli zake za twarika.

Sheikh Swaleh alitokea Unguja kwenye miaka ya 40 na mmoja wa wajukuu zake ukooni kwao ni mwandishi mashuhuri wa makala wa gazeti la An-nnur,  Sheikh Ben Rijaal pamoja na golikipa wa zamani wa Timu ya Cosmopolitan, Abdulmout.

Mungu ndiye mkamilifu wa kila jambo!

Abdallah Tambaza.